 |
DIE MELGISEDEK ORDE
VERSKEIE SKRYWERS
Hoofstuk 34
|
| Spring: |
1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18, 19, 20, 21, 22, 23, 24, 25, 26, 27, 28, 29, 30, 31, 32, 33, 34, 35. |
|
 |
INNERLIKE VREDE `N NOODSAAKLIKE
VOORVEREISTE VIR `N MELGISÉDEKPRIESTER
22 Die volgende gedeeltes is nou onlangs deur
ons Vader gedikteer aan iemand hier op die
grond van Dogter van Sion, en moet as `n
noodsaaklike voorvereiste beskou word vir enigiemand wat
strewe na opneming in hierdie wonderbaarlike orde. Dit help
alles niks as ons die Melgisédek-orde in die Skrifte kan
herken, ons die profesieë bestudeer, maar ons mis dalk om
opgeneem te word in hierdie Liefdes– en Vredesorde van
ons dierbare Vader. Daarom is dit allernoodsaaklik dat ons
die innerlike Vrede en Liefde nastreef in ons harte, want
eers as ons dit goed bemeester het, is ons gereedgemaak
om in Sy Melgisédek-orde in te gaan. Soek dus nie hierdie
orde buite u nie, maar soek na hierdie orde binne uself.
Soos geopenbaar deur ons Vader aan Bertus Hanekom:
Voorskrif vir vrede
22/11/2007 om 20h00
Die wêreld is naarstigtelik besig om hom voor te berei
vir selfvernietiging – ‘n oorlog om alle oorloë te oortref.
Wapenarsenale word steeds gedugter en groter, meer
gesofistikeerd om uit te wis en te verwoes.
Kyk, julle leef in vyandskap met mekaar; julle loop met
blinde woede deur die lewe; julle troetel oogklappe,
sodat julle nie miskien sal sien wat tot vrede lei nie.
Bure leef in kwaai vriendskap; huise en huwelike en
harte word vernietig deur onvrede en ontrou.
In jou diepste wese is jy in ‘n stryd met jouself en met
My. Hoe gevoeliger julle vir die stem van My word en
hoe sensitiewer julle vir die influistering van die gees is,
hoe duideliker sal die dinge word wat vir julle vrede
nodig is.
Julle moet die heerskappy en koningskap van My die
Vader erken. Omdat julle My nie wil aanbid nie, neem
minderwaardige dinge My plek in. Dan word julle
uiteindelik soos die dinge wat julle liefhet en dien. Kyk,
Ek het nog altyd in omgang met julle, die sekerheid
gegee dat julle vir My saak maak. Om vrede te kan ken,
moet julle My ernstig opneem. Julle moet julle
ongeordende lewens en gesindhede onder My
heerskappy plaas; julle gedagtes, woorde, dade en
ideale. Kyk, julle moet met inspanning die dinge najaag
wat tot julle vrede dien. Vrede lê binne die bereik van
elke mens en is nie net ‘n ydele droom nie.
Voorwaar Ek sê vir julle, julle moet My volmaakte wil vir
julle lewe soek, My wil aanvaar en gehoorsaam. Julle
eie begeertes moet ondergeskik word aan My wil.
Staan vir ‘n wyle as`t ware eenkant. As dit enigsins
moontlik is, sonder jou af met My. Dit hoef net vir enkele
minute te wees; maar doen dit. Bevestig net weer jou
afhanklikheid van My en glo dat My vrede ook vir jou
beskikbaar is, net vir jou om te neem.
Laat hierdie lewensfilosofie stilweg jou lewe beheers. Jy
sal sien dat spoedig sal jou moeë, gejaagde gees tot
bedaring kom en My vrede sal soos ‘n verkwikkende
reën jou lewe verfris. As jy nie liefde het nie, het jy ook
nie vrede nie. Vrede is ‘n gawe wat Ek en Ek alleen aan
jou gee. Ek verwag dat julle dit aan ‘n vredehonger
wêreld moet deurgee.
Met die koms van die langverwagte Messias en
Meester, is die aarde oordek met die moontlikheid van
goeie verhoudings, welsyn en geluk. Daarom die
hemelse boodskap: ‘Vrede op aarde vir die mense in
wie Ek ‘n welbehae het. ’ Daar lê egter ‘n oseaan van
droefheid en teleurstelling in My woorde; ‘As jy maar net
vandag wou insien wat vir jou vrede nodig is! Maar nou
is jy blind daarvoor. ’ Kyk, Ek bring die hemelse vrede
op aarde in die harte van mense wat My toelaat om dit
te doen. Die woord praat van die evangelie van vrede.
Kyk, Ek bevestig dit self: ‘Dit sê Ek vir julle, sodat julle
vrede kan vind in My. ’ Met hierdie vrede moet julle op
elke terrein van die lewe gaan leef en werk. Kyk, toe Ek
My dissipels uitgestuur het, was My woorde aan hulle:
‘As julle in ‘n huis kom, moet julle eerste woorde wees:
‘Vrede vir hierdie huis. ’
Hierdie Christus-vrede moet in julle harte heers; dit
moet julle bewaar van alle magte van onvrede; dit moet
julle inspireer om julle vir vrede te beywer; dan sal Ek,
wat Die Vrede is, met julle wees.
Hierop moet julle Christelike ywer toegespits wees: Om
as kinders van die vrede met alle mense in harmonie in
goeie orde saam te leef tot My eer.
Waar daar geloof is, is daar liefde. Waar daar liefde is,
is daar vrede; waar daar vrede is – daar is Ek, julle
Vader, en waar Ek is, is daar geen nood nie en daar
gebied Ek My seën.
Beywer julle vir vrede met alle mense. Vrede op aarde.
Amen
Sjaloom! Vrede vir julle!
23. 11. 2007 om 00h06
Ek sal julle gebede verhoor en aan julle vrede gee!
Sjaloom – beskryf die ideale toestand in die lewe. Dit
behels volheid, volkomenheid en harmonie.
Dit is om te wees, eerder as om te besit. Om te wees
wat Ek bedoel het jy sal wees. Wat jy waarlik is, is veel
belangriker as wat jy besit. Kyk, jy word in die laaste
instansie nie beoordeel aan jou besittings nie, maar aan
die grootheid van jou gees. ‘n Sjaloom-mens is ‘n mens
wat innerlike vrede, gemoedsrus, harmonie en
vervulling ken. Dit is ook die verhouding wat tussen julle
behoort te wees.
Die sjaloom-vrede is ‘n gawe van My en Ek verwag dat
julle dit aan ‘n vredehonger wêreld moet deurgee. Kyk,
julle staan ook onder die opdrag van My, julle Vader,
wat gesê het: ‘Soos die Vader My gestuur het, stuur Ek
julle ook. ’ Voorwaar Ek sê vir jou, liefde en trou sal
mekaar ontmoet, geregtigheid en vrede sal mekaar
omhels.
Eiréne: - Dit word gesien as ‘orde’. Kyk, Ek is tog nie ‘n
God van wanorde nie, maar van orde en vrede. ‘Waar
eiréne heers, is elke ding op sy plek en funksioneer dit
binne die wil van My. So moet alles ordelik en vredevol
verloop.
Eiréne is die groot gawe van My in die eindtyd. Daarin is
vervat ‘Vrede op aarde’, wat gepaard gaan met die
koms van die vleesgeworde Woord, Messias en
Meester. ‘Soos die môreson sal Ek opgaan en uit die
hoogte op julle afstraal, om lig te bring aan die wat in
duisternis en in die skaduwee van die dood lewe, om
julle voetstappe te rig op die pad van vrede. ’
Voorwaar Ek is julle vrede! Ek het julle vrede
bewerkstellig. Ek is die een wat ‘n einde maak aan
vyandskap. In die plek van haatdraende mense, skep
Ek ‘nuwe’ vredeliewende mense. Kyk, die muur van
vyandskap het Ek weggeneem.
Hierdie vrede stel julle dan ook in staat om in vrede met
julle medemens te lewe. Kyk, julle word gesante van
vrede. Hierdie vrede groei in julle as vrug van die
Apartgestelde Gees. Julle beywer julle vir die dinge wat
julle onderlinge vrede opbou en bevorder. Dit skep ‘n
geestelike eenheid en samehorigheid wat noodwendig,
onder My begeleidende hand, op vrede uitloop.
Eindelik lei dit dan ook tot innerlike sielevrede, omdat ’n
mens nou ook van binne ‘in orde’ is. Alles wat verkeerd
en buite orde was, is uit die weg geruim en elke ding in
julle lewe is in sy regte perspektief rondom My
gerangskik. Dan het julle ‘n voorsmaak van die hemelse
vrede, wat die eindresultaat is van eiréne – ‘vrede met
julle!’
Amen
Valse vrede
23/11/2007 om 20h35
In die lande waar aardbewings meer dikwels voorkom,
is daar altyd voor ‘n aardbewing ‘n onwerklike stilte;
maar dit is sinsbedrog. Dit skyn of die natuur op ‘n
mistieke wyse gedemp is en asof die aarde die asem
ophou vir die komende ramp. Die lug hang swaar van
onheil; geen blaartjie roer nie; die voëlgesang verstom;
die stilte van die kerkhof daal oor alles neer. Maar
intussen staar huise, dorpe en stede, en duisende
mense algehele uitwissing in die gesig.
So is dit met die swye van My, julle Vader, oor die valse
vrede wat in My Naam verkondig word. Baie
interpreteer hierdie stilte van My verkeerdelik as vrede,
maar dit sal gevolg word deur die vernietigende
aardbewing van My oordele.
Kyk, aan die Tessalonisense het die dringende
waarskuwing gekom; “Wanneer die mense sê; ‘Alles is
rustig en veilig’, sal die ondergang hulle skielik oorval
soos geboortepyne ‘n swanger vrou, en niemand sal
ontkom nie”.
Hoe word hierdie valse vrede dan omskep in My egte
vrede, Gehoorsaamheid en ‘n toegewyde lewenswandel
bring ware vrede; “vir die wat My wet liefhet, is
daar groot sekerheid. ” Soos daar vrede in die natuur is
wanneer alles volgens natuurwette verloop. So vind
julle vrede wat in My volmaakte wil wandel. Daar is ‘n
groot verskil tussen vrede en die dood, soos daar ‘n
verskil is tussen ‘n kalm en ‘n dooie see. Die kalmering
wat opium of dwelmmiddels bied, is spoedig uitgewerk
en dan word die verslaafde weer die prooi van onvrede,
die hunkering na die kwaad en die onvrede van ‘n
skuldige gewete wat martel.
Alleen by My vind julle ware onvervalste vrede, omdat
Ek die bron daarvan is. Wanneer My vrede, deur
Messias, julle deel word, leer julle die ware betekenis
van die woord verstaan. Die Messias se dood en
opstanding is die waarborg van julle vrede. Dit word aan
julle bevestig deur My woord van vergiffenis, in
antwoord op julle berou en belydenis.
Dan leef julle van dag tot dag vanuit die egte vrede wat
die ryke deel is van My, julle Vader se gelowige kinders.
Dan kan julle met eerlikheid verklaar: “Alles is reg!”
omdat julle in die regte verhouding tot My staan en
daarom deelgenote van My vrede word.
Kyk daar is ‘n bevrydende blydskap in die wete dat jy
geloof en vertroue in My, die toets deurstaan het.
“Vrede vir jou wat naby is. ” Onthou altyd hierdie
woorde: Ek, die Vader, sal jou altyd liefhê en aan jou
vrede gee. Amen
|
|
|
 |
|
